Lotu Malanga 12/07/2025

‘E ‘Otua Mafimafi ko ho mau fakaa’u

‘Oku ‘akoe ‘a Taimi mo ‘Itaniti

Ko koe ia ‘a e ‘Otua ‘o e ngaahi Liliu

Ka koe ‘Otua ‘oku ta’eLiua

‘Oku motu atu ho kamata’anga pea ta’e’iloa ho ngata’anga

Ko Koe Ia koe ‘Alifa pea mo ‘Omeka. 

‘Oku Lalanga ‘e ho’o to’ukupu ‘a e fou’anga ‘o ha’a tapu

‘Oku ke Lamasi ‘a ha’a toiaki ke fai homau fakaehau

‘oku ke pouaki mai neongo ‘a e ‘ikai ke mau kau he lau

 

Pea kuo lau atu ai ‘a ho’o fakakau

Ka ‘oku mo’utaafu’ua ‘emau konifesio ‘I he ‘ilo ‘emau ta’e taau

‘ilopau ‘a e ‘ikai taau homau topuva’e mo ho’o toputapu

Ka e fakafeta’i, he koe puipui tapu e kuo ke tatala

 

Kuo ongona mai Kuo maha ‘a e feleoko ‘o ‘Itaniti,

Pea ‘oku ‘ikai ai ke mau kei lau tama fai ki fatu

He Kuo paea ‘I taimi ‘a e Pilinisi ‘o loto langi

Ki mamani, kuo ke hoko mai ko homau talafungani

Ko koe ia ‘a e Tu’I ‘oe Kilisimasi

 

Kuo ke hamusi kimautolu mei he ngutu ‘o e li’ekina

Mau fakatalutalu ai he ko ‘itaniti ia mo ‘ene fusi tangata

Maanava hake pea fakamanava hake-ko homau fakakoloa’ia

Pea ‘oku ke lea fakalelu mai ko homau taaki-e-kina

He ‘oku uho ‘aki ho’o ‘ofa homau tala’Otua

 

‘Imanuela, kouke ‘ahia ‘a e kolo vavalo tu’u he ta’eiloa

Pea malumalu Melino ai ho mau fa’ahinga

‘O fai homau fakafekau’aki ki ho hako tupu’a

Neongo ‘a si’emau paea he mamatea ‘o ha’a toafa

‘Oku ke ohi pe kimautolu koe fuifui tama ‘o ta’engata

Ke fakaola ai ‘a e founga taha ‘a ‘Otua moe tangata

 

‘Imanuela, ha’ele mai ki homau loto fale

Ko hota va kuo ha’i ‘aki ‘a ho’o Kovinanite

Koe fakafeangai-ma’oni’oni ‘a ho’o mata’ikoloa

Pea kuo ke tatala pulonga ke mau mataa ‘a ho’o folofola 

Ke ‘oua te mau kei hangee ha tavake taa mafua

Ke mau ‘unu’unu atu ‘o lata he fakamolemole’i ‘emau angahala

Pea ke mau ‘apitanga he melino ‘a ho’o ‘Ofa

 

 

Talamu’a na’e Misiteli, ka kuo Ke hoko mai koe Misaia

Ko e le’o ee ‘oku Kalanga meihe Toafa

Ko e ma’olunga ke ma’ulaloa, ko e fihi-tu’a ke tau’ataina

Ko e tokakovi ke toka lelei, koe pikopiko ke hangatonu

‘a e Kuonga na’e ‘ikai ke tolona, kuo hoko ia koe maka lauikuonga

‘a Kimautolu ‘oku fa’a kula noa pe ‘i la’a vela

Kuo ongona Fakalelu pea mokomoko ‘a ho’o folofola

 

Fakafeta’i ko ho’o lave mai he kuo ‘itaniti ho mau fakaa’u

 Ke hoko ia koe tauleva kohomau Kakala fakasalusalu

He koe longovuka kuo talaki mei tu’angalu

Ka koho’o Folofola ‘oku fai homau fakamantu

Koho’o ‘Ofa koe veitapua pea ngatuvai  ki he pa ‘a ngangalu

 

Hange koe tala’ofa ne fai ki he Peteliake

‘oku pehee ‘Eiki ‘a ho’o hoko ko homau fakaake

‘A kimatolu efu ka kuo ke fakanofo ki ho ‘afio’anga

He kuo ke ala mai ke fakakoloa’ia ho mau masiva

Kuoke hamusi kimautolu mei homau tukuhausia

Fa’ito’o homau ngaahi lavea

Pea ‘omi ‘api ke ‘oua na’a mau toe paea

 

Tu’i ‘oe Kilisimasi, ako’I kimautolu ke mau poto he fiekaia ki ho’o ‘Ofa

Ako’I kimautolu ke fakamasivesiva ki mamani ka e fakafonu ki ‘Itaniti

Ako’I kimautolu ke li’aki ‘a e fakamuna, kae fakafonu ‘Itaniti

Ako’I kimautolu ke mau taha mo Kalaisi, kae tokonia si’i ta’aliekina

Ako’I kimautolu ke ‘oua na’a hoko homau ngaahi mafai ko ha fakamasiva ki a ha’a vavai

Ako’I kimautolu ke ‘oua ‘e fu’ia he Toafa he ko homau fetaulaki’anga ia mo e Misaia

 

Ko homau ‘Imanuela, ‘oku mau hiki atu homau Pule’anga

‘Oku lau koe pul’anga hau, ka ‘okapua ‘oku ‘ikai ke uho ‘aki ‘a e ‘Afiona?

‘Oku muna kotoa pe ‘a ‘emau lau

Koia ‘oku tapa atu ‘a e hufia homau kau taki mei Washington ‘o a’u mai ki Austin

Ke fakasipinga’i kotoa mai mei langina, he ko ho’o taki, ‘oku ‘elito ‘aki ‘a e ‘Ofa.

 

Fakaa’u atu ki si’omau motu Tupu’anga, ki tonga, ki a Taufa’ahau, Palemia, moe falealea.

Fai mai homau fakama’uma’uluta’i pea ke ma’oni’oni ‘a e fakafeangangai.

Kau mai ‘ia ha’a taki lotu, ‘I Tonga pehee foki ki ‘American pea moe tapa kotoa pe ‘o mamani.

Kemau hoko kotoa koe vaevae maama

Ke femolimoli’i ‘a ‘emau ngaahi a’usia ke hiki hake ‘aki ho Siasi mei taimi ki ‘itaniti  

Ke fakamanavahake ‘a ha’a ta’aliekina pea ‘ikai ke mau kei lau tu’unga ka ke faktonutonu ‘aki kimautolu ho’o ‘ofa  

 

‘Otua ‘e ‘ikai ngalo homau kaungaa fononga ‘i he mohenga e mamahi

‘Omi ha nonga moha fiemalie.

Ala mai ho to’ukupu mafimafi pea fakaola

‘Ikai ngalo si’I famili kuo mole atu,

‘Eiki ko e anga e ‘emau fononga, ko e hikihiki teniti pe

Fakana’ana’a ‘a lo’imata pea tafi honau ngaahi mamahi 

Ofongi ‘enau mo’ui ‘aki ‘a ho’o fakamo’ui

 

Faka’au atu ‘a e Lotuni ki ‘api populana

Ke mau kau fakataha he hiki mei homau ngaahi motu’a tangata

Faka’ilo kia kinautolu, neongo e ha’isia moe popula,

ko e tau’ataina ‘oku ma’u ia ‘I he piki kia Kalaisi

 

Kau koe ‘I he faifekau mo hono famili

Tuku kenau tu’uloa ‘I ho’o folofola

Pea fakafonu honau feleoko he tapuaki ta’engata

Pea fakaivia, fakalaumalie’ia,

pea fakapoto’I he fakafeangainga ‘oe fua kolosi ‘oku ne fai

 

Tu’I ‘o e Kilisimasi, tau hokohoko fonoga atu a

pea fakaheka kimautolu ki ho’o nonga

Kemau muimui ki he fakama’unga ‘o e Kilimasi

Ko e Misaia kuo ne ha’ele mai

Tali kimautolu moe huu ‘oku fai ‘I he huafa melino ‘o Kalaisi

 

‘Emeni