Lotu II

1.     Fakalangilangi

‘E ‘Otua ‘a e ‘Afiona, ko e Tamai mafimafi,

Ko Koe ko e Tu’i ‘o e ngaahi liliu

Ka ko Koe ‘oku ta’eLiua

koe kaimeli’anga ’o taimi pea moe misiteli Lilo o Itaniti

Koe Fakama’opo’opo’anga  he Na’ake fakamaluu pea Fakamalu

Ko Koe a e Tu'i fakaleveleva mo aoniu,

koe hautoka kuo humaki ki ai ’a e ngeia moe langilangi ’a homau ’Univeesi

Ko Koe ‘oku ‘ihe taumama’o fau pea Ta’emahakulea ho Ngeia

Talamai ‘oku ‘ikai ‘iai ha tatau pe kakunga kene katoi Ho Afio’anga lika

Talu mei ‘Itaniti koe mafi ‘oku ‘ikai liliu pea ta’e liua

 

Fakafeta’i ko ho’o tukumu’a ko e kelesi

Kelesi tolonga ko e ma’uma’uluta’anga ‘emau Tui

Kelesi laulötaha ko e hifo’anga ‘a Ho’o fai meesi

Fakfeta’i ko homau fakahoifua ki he ‘Afiona oku tu’unga pe ‘ia Kalaisi

Ko e Lolou’anga a e fakamaau haohaoa ae Afiona

Ke hoko ho Alo tofu pe e taha ko homau fakmo’ui

Pea kuo ataa ke mau feleoko kotoa ki Itaniti  

Neongo oku huki tonu ‚a e ui ma’oni’oni ae Afiona he lotofale oe Siasi

Temau kei fakafeta’i pe he koe pule haohaoa ia a e Afiona

 

2.     Vete

Kuo mau ngaue hala'aki homau ngaahi lakanga

’O molimolitu’u pea ’ao’aofia ai homau ngaahi fatongia.

He kuo ikuna'i kimautolu 'e homau ngaahi fili

Fakamolemole he koe fakapelea ‘a vale ‘a ‘emau fakafeangai

He ko ‘emau Tui ‘oku ‘ikai taau

‘oku angatu’u ki ho’o fekau ma’oni’oni

Fehalaaki ma’upe 'a homau nima

mo e ta'etaau 'a e laka 'a homau ngaahi va'e

Pea ta’e Fiefakamalo’ia homau Loto

 

‘ikai koaa koe  Kii ama ta'e 'alomu'a ’a ‘emau mo’ui ta’efakaongongo?

‘Isa, ‘a ‘emau mo’ui fie’eiki

Fakmolemole ‘a e ‘Afiona, ‘auhani mo’oui pe mei Langina’

Ko e mo’oni e he ko kimautoluni koe Kofe Foa

Ngaahi maama ‘oku kohu tu’u

‘o fakapopo’uli pe homau ngaahi founga

Kae Fakafeta’i, neongo homau maama ulo kovi

He’ikia pe teke tamate’i

Ka ke hanganaki pe ke ngaohi

He’ilo pe na’amau toe mo’ui lelei

 

4.     Kole

 Ko Koe pe ‘Eiki homau Koeli kuo tanu pou meihe fauniteni ‘o maama  

He filo tuku fakaholo he kovinanite ne fai ‘i Kalevale

Hangai fofonga mai he kuo ke fakafekau pea fakakaua

Tamai ‘oku mau vete atu ‘emau ngaahi to’onga fakalielia

‘A 'emau situ’a meia teKoe, siokita, ta’e’ofa,  mo e 'afungi

Kuo ‘ilonga ai ‘a ‘emau Tui te’eki a’ua’u

Pea moe mo’ui ‘oku te’eki ‘au’au

Langolangoi mai mei langina kae holo atu ai ‘emau tupe mo’ui

 

Kuo ke ako mai, ka mau ka kole pea kole ho Huafa

Koia oku hapai hake homau loto moe ivi ikai lava ha me’a

ke fakahokoloto atu mo kimautolu ni koe me’a efu

Talafatongia i he emau mo‘ui ke alaha atu koe fanga-i-Lupe o Itaniti

Ikai koa kuo mau kula i vao pupuha

Paea i hakau vela, pea hopohopokia i moana

Sisu he taulanga uu, ko koe pe ae fa’akinanga   

Luluku homau loto ta’eTui pea auhani aki a ho‘o fekau fo’ou

Ako’i kimautolu ke mau tu’u o fononga i ho’o man’oni’oni

Fua ho’o ‘ioke pea ke mau ako meiai  

Ke ‚oua ‚e hoko ‚emau lotu ko ha fangota fai ki ha kato ava

 

 

5.     Hufia

‘Oku tala ‘e taimi ‘a e laka atu ‘o ‘emau fononga

Koe va’e hono Saliote ‘oku vilo ma’u pe

Ko e fakaa’uu ‘o taimi ‘oku tofanga tonu ia homa loto faleni

Ho mau ngaahi vakani ‘oku tomohopo he peau ‘o Taimi

Ko homau vakani ko e vaivai fu’u

‘oku taau keke ma’uma’u pe ‘i Vaka

Ke mau hangahanga fai pe ke hu’u taha pe ki hevani

‘oku mokulu-’a-lo’imata he kuo mau hakenga ‘i ‘aho langa-maka

koho mau ‘ofa’anga mo e maheni’anga

Si’emau Tamai moe tuofefine, si’omau tokoua moe ‘emau fa’e

'E Tamai Oku mau hufia atu ‘ae ongo fale mamahi:

Si’i Pesani moe family ki Tonga

Si’i Meliame mo e fanau paea

Holoholo ‘a lo’imata mei langina

 

Ko e maama tutuku ‘eni, ko ‘emau hikihiki teniti pe

Ko e ‘aunofo pe ‘a kumi fonua

Ko e hala’ena ‘oku fa’a pulia ka ko Sisu pe ‘oku faka’uli

‘oua ‘e loa pe vaivai

‘oua ‘e hela pea tafoki

He ko Sisu pe’ena ‘i vaka ko e tokoni ofi

Ke mau ‘i he ‘Eiki pe

Si’i tala’ofa ia

Ke mau Kaveinga ‘aki

Ka e hanganaki ke a’usia

He ko’emau hikihiki Teniti pe

Ke a’u ki Hevani

 

A’u atu emau hu ki falemahaki pea moe Pilisone

Si’o mau kaungaa fononga e‘epa he mohenga o e mamahi

Oku mau tangi hake ki ho to’ukupu fakamo’ui

Angi mai a e manava oe fakamo’ui ke veteaki ae ngaahi no’o oe mamahi

 

A‘u atu a e lotuni ki homau kaunga fononga he api popula na

Ulo mai ho’o maama pea tafe ho’o kelesi ke nau pulupulu’aki

Ke hoko ae mo’ui koe mo’ui kuo Liuaki

Koe mo’ui kuo a’u pea talia a Kalevale  

 

Oku mua hanga hake koe’uhia koe faifekau mo hono famili

Ae tukulolo mo’ui kuo fai kae fua kakato a e nague a e Afiona

E Tamai, oku mau hanga hake,

uha mai ho tapuaki ke fakafaingamalie’i ho’o ngaue

A e teu foki ki Tonga

Oku ikai ko ha me’a faingofua he ‚emau fakafeangai i Taimi

Koia a e tautapa o e ahoni

Oku fa’a matangi a e hala fononga

Oku fa’a peaua a e tahina

Aonga pe ke vakaua

Sisu Ofa he folau

Lusia pe ki ho taulanga ma‘u

 

Oku mau hanga hake, koe uhia ko hou’eiki, setuata moe siasi hono kotoa

Kau mai pea tuku ke hoko ho siasi koe fakamo’oni tu’ukimu’a

Koe tauale’o ke hakeaki’i Tui pea koe Puatalefusi kia ha’a paea 

Oku hake a e lotuni koe uhia koe folofola oe ahoni

Laumalie keke tataki, tuku ke fakafonu a e lolo emau ngaahi maama maha

Pea ke tutu ia o hoko koe Amatakiloa mei taimi ki Itaniti

 

6.      Foaki

Foaki atu homau ngaahi Laumalie ke ke Taloni aki

Pea hoko foki emau ngaahi mo’ui koe makatu’u oku ikai naguea

Faka’ilo mai ho Kaveinga pea fakataulama e vaha he kuo tuku folau

Me’a ngaue aki kimautolu pea fakaa’u he ko emau tukupa ke toe foaki.

Ko e ha ha me’a oku ikai a‘usia kiai a e lotu, fakaa’u lotu pe mei langina

Pea 'oku mau kole kotoa 'a e ngaahi me'a ni 'i he huafa 'o e Tamai, 'Alo mo e Laumalie Ma'oni'oni.

 

'Emeni.